...Y tu, ¿de qué familia yes?

OXETIVU DE LA ACTIVIDÁ

     Trátase de qu’investigues sobre los oficios que teníen los tos güelos y güeles y sobre los que tienen to pá y to ma. Esta actividá céntrase, sobre too no que se llama la cultura oral, ello ye, cómo la llingua falada nos sirve pa la tresmisión de datos culturales y la naturaleza d’esa cultura.  

¿QUÉ TENGO QUE FACER?  

     Tienes que recabar y rescatar datos sobre los oficios que teníen los toos güelos y güeles, y los que tienen to pá y to ma. Nun solo ye dicir, por exemplu, mio güelu yera mineru: hai qu’escarabaicar y ver d’ónde yera, cómo lu llamaben, si tenía dalgún otru oficiu o trabayu que se-y diere bien, qué anécdotes se recuerden d’ellos, cómo conoció a la to güela, cuántos fíos tuvieren… Y too eso, alcuérdate, redactao, y redactao en llingua asturiana.  

     ¿CÓMO EMPIEZO?  

     Empieza, primero, seleccionando la fonte d’información: llámase fonte d’información a quien t’apurre los datos pa facer el trabayu. De tar vivos los tos güelos, son ellos los que te van dar la información de primer mano, la más completa. De morrer ellos, tienes qu’entrugar a to pá, a to ma, a los tos tíos…  

     De mano pues dexalos charrar ensin más. Pero hai información esencial pa facer el trabayu, y son preguntes que se puen facer pa caúna de les persones que formen la parte principal del trabayu: los güelos y les güeles:  

• ¿Cómo se llama/ba? 
• ¿Cómo lu/la llama/ben y por qué? 
• ¿D’ónde yera? 
• ¿Qué trabayu o trabayos tuvo? ¿N’ónde trabayo? 
• ¿Con quién? 
• ¿En qué consistía esi trabayu? 
• ¿Qué ferramientes s’usaben nél? ¿Qué nome teníen? 
• ¿Cuándo conoció a la pareya? ¿Cómo se conocieron? ¿Cuándo casaron? ¿Cuántos fíos/fíes tuvieron?  

     Alcuérdate, esti ye’l primer pasu, pero non el definitivu, quier dicise que tienes que consiguir dar forma a lo datos que t’apurren, dar forma de cuentu, de novela o de historia, d’una historia mui importante na que formes parte de les persones protagonistes, porque non en vanu tán contando la to historia.      

IMPORTANTE 

     Quiciabes al dir sacando estos datos t’enteres d’otres coses: refranes, cosadielles, cuentos, cantares, fiestes que se facíen enantes: APÚNTALO TAMIÉN. Ye una ocasión bien guapa pa que recueyas datos de los que mui posiblemente nun volverás a falar. 

¿CUÁNDO LO HAI QUE PRESENTAR?  

      Esti ye un trabayu pa entregar dempués de les vacaciones de navidá. Como fecha tope pa entregalu vamos poner el día ____ de ______.

¿CÓMO LU HAI QUE PRESENTAR?  

¡¡ATIENDI BIEN!! PORQUE ESTO YE BIEN IMPORTANTE:  

     Hai que presentalo en folios DIN A4 blancos.

     El primer foliu tien que ser pa la portada. Nella hai que poner: nome y apellíos, cursu, títulu de l’actividá ( Y tu, de qué familia yes?) y destacao, el títulu que tu-y pones al to trabayu.  

     Dientro, has de poner el testu. Procura facelo a ordenador, bien redactao, alcuérdate de que la redacción tien que tar escrita en llingua asturiana, y procura acompañar el testimoniu que vayas dar de documentación gráfica, qu’illustre’l to trabayu: una semeya escaneada o fotocopiada de to güelu o güela trabayando, o de la familia, daqué que faga ver cómo yeren.  

     A la fin, nel últimu foliu tienes que poner les fontes d’información: el nome y los apellíos de quien te dio esa información; los años, ente paréntesis, el llugar d’ónde yera y el llugar y la fecha d’onde-y sacasti la información. Por exemplu:  

 Arístides Gómez Llaneces, “Arístides el zapateru”, (81 años) de La Vega’l Colláu (Ayer), en Turón el 12/08/2005   

     Y si te sobra información (cuentos, refranes, cantares, histories, lleendes, etc.) y quies facer otru trabayu d’esti tipu pa xubir bien de nota na evaluación viniente    

¡¡NAMÁS TIENES QUE FACÉNOSLO SABER!!