jueves, 4 de diciembre de 2014

Los siete cabritinos

Nel mio pueblu que se llama Lloreo, fae munchos años, había una cabra que se llamaba Xitana que parió siete cabritos. Nunca los dexaba solos porque tenía mieu que los xintara'l llobu. Un día Xitana fue a la despensa, onde tenía guardao tola comida, y diose cuenta de que nun había nada. Entós decidió salir a comprar comida porque nun teníen nada pa xintar esi día.
     Enantes de baxar a La Pola a comprar, ya qu'en Lloreo nun había tiendes, y esi día nun subía'l viaxante, que yera'l que xubía los alimentos; advirtió bien a los fiyos que diba marchar y que nun abrieran la puerta a naide. Ella díxo-yos que cuando llegare de vuelta otra vez a La Campalave qu'asomaría la pata per debaxo de la puerta. Los cabritos xuraron y perxuraron qu'asina sería.
    Cuando Xitana marchó, el llobu taba escondíu en Llagos, onde se veía perfeutamente La Campalave, entós namás ver colar a Xitana fue pa la Campalave y picó a la puerta.
     Los cabritos preguntaron:
     -¿Quién ye?
     -Soi la vuestra ma.-contestó'l llobu .
     -¡Qué voz más ronca tienes!-contestaron los cabritos.
      Entós el llobu fue al gallineru de Loli y comió tolos güevos que había p'aclariar la voz y volvió a picar a la puerta.
     -¿Quién ye?
     -Soi la vuestra ma.
    -Asoma la pata per debaxo de la puerta-dixeron los cabritos.
     El llobu asomóla y los cabritos dixeron:
     -¡Ma! ¡Vaya pata más prieta que tienes!
     Entós el llobu marchó pal Xerrubil, que ye onde tenía mio güelu la fariña de los gochos y metió la pata ente ello pa que-y quedara la pata blanca, y volvió pala Campalave a picar a la puerta.
     -¿Quién ye?- dixeron los cabritos.
     -Soi la vuestra ma- dixo'l llobu.
     -Asoma la pata per debaxo de la puerta...- dixeron los cabritos.
      El llobu asomó la pata per debaxo la puerta y como taba de fariña consiguió engañar a los cabritos y abriéron-y la puerta. El llobu entró y comió a tolos cabritos, menos al más pequeñu, que s'escondió ente la lleña que tenía so ma preparao pa tizar el fueu.
     El llobu dixo n'alto:
     -¡Voi dir a dormir la siesta al par del ríu La Callá.
     Entós el cabritu oyólu. Cuando llegó so ma díxo-ylo y fueron a buscar a Xesús el lleñaor pa que-y dexara l'hachu. Fueron a buscar al llobu y como taba dormiendo abriéron-y la barriga y salieron los cabritos mui contentos porque so madre los salvara. La ma enllenó-y la barriga de piedres al llobu y cosió-yla con filu de coser los sábanos, que ye lo más fuerte. Cuando'l llobu despertó tenía muncha sede y agachóse pa beber nel ríu La Callá, y como-y pesaba tanto la barriga calló al agua y afogóse.
     Los cabritos y la ma al ver que'l llobu s'afogare, dieron saltos d'allegría.
 
     CRS (4ESO DIV 20142015 IES DVM)

No hay comentarios:

Publicar un comentario