Los tres hermanos

Nel centru La Pola vivín tres hermanos. El primu d'ellos yera mui malu y tenía-yos muncha envidia porque ellos yeren estudiosos, teníen un par de carreres caún y unes cuantes perres, y él yera un probe chaval que nun estudiaba, y tampoco trabayaba pero tampoco se molestaba en facelo y amás taba pasáu de la cabeza.

     Un día los tres hermanos empezaron a recibir amenaces d'él, nun-y dieron muncha importancia porque sabíen que taba mal pero la cosa empezó a tener importancia cuando-yos empezó a romper los cristales de los coches, a picar al timbre a les tantes la mañana y a recibir unes cuantes llamaes telefóniques al cabu'l día. La cosa llegó a tal puntu que los hermanos taben muertos de mieu yá que'l primu también andaba faciéndo-yos pintaes na paré poniendo que diba matalos.

     Pa escapar d'él decidieron comprar una casa caún en distintos sitios del pueblu. L'hermanu más pequeñu compró un baxu ya que yera 'l que menos perres tenía; el medianu compró una cochera porque decía qu'asina podía ser mas dificil de topar yá que naide s'imaxinaría que viviría nuna cochera. Entós, púnxo-y unos radiadores, una ducha, un bañu, agua caliente, lluz...

     Tamién puso na puerte unes cuantes barres de fierru y empezó a facer más coses por su cuenta.

     El tercer hermanu, el mayor, marchó a vivir pa una casa que tenía en *LA CORONA* que ta p'arriba Fechaladrona. Compró esa casa fae munchu tiempu yá que-y gustaba munchu el monte y los animales,amás yera'l so sitiu de relax. Naide sabía d'esa casa a nun ser los sos hermanos.

    Él fue'l que menos trabayu tenía que facer yá que les puertes yeren de maera y la casa tenía verxes per alreor. Namás que tuvo que comprar comía pa unes cuantes semanes y nun-y fixo falta garrar bebía porque a unos pasos de la cabaña tenía una fonte.

     Cuando'l primu s'enteró de que yá nun vivíen naquella casa casi se vuelve más llocu tovía; empezó a buscalos per tolos llaos, hasta llamó a la televisión pa ver si alguien los viere y si asina yera, que lu llamaren al so númeru de teléfonu.

     La xente al velu y ensin tener nin idea de lo que pasaba, llamáronlu y dixéron-y onde vivía l'hermanu pequeñu. Fue corriendo a la casa y empezó a pegar puñetazos a la puerte, a pegar voces, y cuando cansó empezó a tira-y piedres a la ventana.

    El pequeñu, aprovechando un descuíu, salió corriendo pela puerte trasera y marchó pa la cochera del so hermanu'l medianu.

    Taba tan asustáu que cuando llegó nun podía nin hablar y cuando por fin se tranquilizó contó-y lo sucedío al hermanu; entós decidieron dir pa casa del hermanu mayor.

     Al día siguiente l'hermanu pequeñu enantes de marchar quixo dir a so casa a por unes cuantes coses pero nun se dieron cuenta de que taba ellí esperando. Cuando marcharon, el primu siguiólos; cuando llegaron al monte, l'hermanu preparó-yos la cena, y mientres cenaben sintieron unos ruíos pero nun dieron muncha importancia porque pensaben que yera algún animal.

     El primu garró una escalera que topó per ehí y subió al teyáu cola intención de colase pela chimenea pero salió-y mal la xugá yá que teníen trampes puestes per tolos llaos de la casa.

     Cuando baxó pela chimenea cayó nuna trampa y quedó encerráu nuna xaula. Llamaron a la policía y lleváronlu deteníu por allanamientu de morada.

 

CCF (4DIV DVM 2014/2015)