Unidá 1. Saber lletra menudo.

Déxovos equí engarametáu un enllaz a un documentu de pdf cola propuesta de unidá didáctica cola que diba trabayar y facer un llibru n'asturianu de la que ponía clas. Taba bien facer materiales pa compartir... ¿Daquién s'anima?

Calcái equí

NT (Notes de la traducción)

La traducción ye un trabayu esixente y non siempre reconocíu. N’asturianu puen atopase una riestra de títulos y obres representativos de la lliteratura universal.

Una lliteratura nun solo s’arriquez coles obres que tán escrites nella por autores que, a lo llargo de la historia, van formando la so tradición, o poles obres que, escanciaes de boca a oreya y peñeraes pola memoria de les xeneraciones, costitúin la tradición oral y popular. La torna, esto ye, el conxuntu d’obres escrites n’otres llingües y traducíes al asturianu tamién formen parte d’un patrimoniu meritable pa la tradición lliteraria.

Les tornes con importantes por dellos motivos. El primeru, porque permiten a los falantes llegar a información, lliteraria o non, na so propia llingua; depués, porque esa traducción implica una reflexón sobre les potencialidaes espresives de la llingua y, arriendes d’ello, la torna acaba por enseñar nuevos modelos y enanchar les posibilidaes lliteraries a quien escribe nesa llingua; finalmente, podríemos dicir que la traducción contribúi a dar prestixu a una llingua. Ciertamente, ún de los baremos que la xente y los estudiosos suelen usar pa prestixar una llingua ye ver qué y cuántes obres tán tornaes a esa llingua; y al revés, ver cuántes obres de la so lliteratura tán tornaes a otres llingües.

Tamién convién tener en cuenta que nun siempre fae falta que seyan llingües diferentes pa facer una torna: pue facese una traducción ente dos variedaes de la llingua, como lo qu’ocurre cuando se traducen obres medievales a la llingua contemporánea pa resalvar les diferencies que se dan na exa temporal de la llingua, o cuando ponemos nun llinguaxe más accesible obres que son complicaes d’entender.

Podemos afitar entós qu’hai munchos estilos de traducir, dependiendo de la fidelidá pa col testu orixe y pa cola llingua  de la que partimos. Podemos facer una versión o una adaptación d’un testu, onde lo que se fae ye una recreación del testu orixinal, condicionada por munchos motivos (estilísticos, divulgativos, educativos, etc.).

Hai xente que nagua por facer una traducción cultural, ye dicir, nun mirar solo polo que dicen les pallabres sinón polo qu’estes impliquen nos contestos que les dos llingües amuesen. Asina, unos personaxes que xueguen al póquer y beben cerveza nuna tabierna nel mundu anglosaxón podríen  tar, guapamente, nuna traducción cultural al mundu asturianu, xugando al tute o a la brisca y bebiendo vinu o sidra nun chigre.

Sicasí, la traducción más perfecta sedría la torna filolóxica, na que los comentarios culturales necesarios pa entender la significación completa de la obra figuren nun aparte que se conoz pola siegla “NT”, o nota del traductor/a. Nestes notes cuídase por facer un tresvase al pie de la lletra y manteniendo’l sentíu lliteral de lo que se diz nel testu.

L’oficiu de traducir ye, ensin dubia, ún de los más desagradecíos de la lliteratura. La persona que traduz tien que conocer a la perfección les dos llingües, la llingua de partida del testu, esto ye, la llingua orixinal na que’l testu se compunxo, y la llingua de llegada o final, la llingua na que va resultar la nueva obra. Nesi camín van dir perdiéndose toa una riestra de significaciones (sonoridá, dobles sentíos, códigos culturales, etc.) que quien traduz tien que minorizar lo máximo posible. Amás, quien traduz tien que tentar de da-y la mesma forma y metese na mente de quien escribió la obra pa da-y el mesmu envisu a les pallabres que ta tornando. Y tres d’esi trabayu fatigosu, tres d’esa nueva obra, el so llabor va quedar arrequexáu a una ringlera embaxo’l títulu, nun tamañu pequeñucu, onde se pon el so nome.

¿De cuánta xente que traduz somos quien alcordanos y de cuántos nomes d’escritores y obres?

Hai llugares y llingües onde, pa resaltar la importancia de quien torna les obres, lo que se fae ye poner na portada, al mesmu tamañu del títulu y l’autor, o  a vegaes mayor, el nome de la persona que tornó la obra a esa llingua; y dello del públicu llector busca, dacuando, les traducciones de determinaos profesionales porque son les más riguroses y les de más prestixu.

¿Sabíes qué...?

La llingua asturiana cuenta con traducciones dende bien llueu. Demientres’l Reinu d’Asturies y Lleón, tornóse’l

Fueru Xulgu del Liber Iudiciorum, un tratáu que caltenía les principales lleis visigodes; amás, munches les fábules

de Marirreguera son una adaptación o versión de les histories de l’antigüedá grecollatina que yá fueren trataes por

autores como Ovidio; nesti sen podíemos contar les traducciones d’Horacio, ente elles la Vitae rusticae laudes

(espublizada como Cantar y más cantar), que fexo Acebal o les traducciones que fizo’l Padre Galo.

Anguaño, y magar les torgues que sufre la edición y la traducción nuna llingua minoritaria y minorizada como ye

l’asturianu, contamos con abondoses traducciones al asturianu de tou tipu d’obres y autores feches dende munches

llingües: Tirán’l Blancu, de Joanot Martorell; Harry Potter y la piedra filosofal de J.K. Rowling; El principín de

Saint-Exupéry; Argullu y prexuiciu, de Jane Austen; dalgunos cómics d’Asterix o de Tintín; Cá los animales, de

George Orwell; Pelleya de badana, de Balzac; El Gran Gatsby, de Scott-Fitzgerald; Peter Pan, de Barrie; La

tresformación, de Kafka, ente otres munches obres, dan cuenta del llabor desendolcáu por xente que traduz movío

siempre pol procuru d’arriquecer la llingua y la lliteratura de nueso.

Notes:

T

Tornar. v. Facer que [daqué o daquién] dea la vuelta, camude la direición. Ponte ehí pa tornar la vaca. 2 Volver [a un sitiu]. 3 Facer que [daqué o daquién] nun siga [una aición, una idea]. Cuando se-y mete dalgo na cabeza nun hai manera tornalu. 4 Protexer de [el fríu], de [el agua]. Estos calcetos tornen munchu fríu. 5 Devolver [daqué dexao o emprestao]. 6 Traducir, poner [nuna llingua lo dicho n’otra]. 7 prnl. Convertise en [daqué], tresformase en [daqué]. || Tornar nún, recuperar el conocimientu. 2 Dase cuenta de daqué.

Tornar ye una pallabra polisémica con bien de significaos, ente ellos, como pues ver na sesta entrada, taría’l de traducir, esto ye, poner nuna llingua lo que ta dicho n’otra. Ye una pallabra que garra asina un significáu precisu pal mundu de la edición, como sucede con otra pallabra, asoleyar, qu’amás de significar poner al sol, nel mundu de la edición significa publicar o editar.

(Espublizáu en Escolinos, 11 de marzu de 2015)

Xeres de comprensión llectora

1)    ¿Cómo pues definir la traducción? (1)

2)    Nel testu atopa un sinónimu pa la pallabra “traducción” (1 ptu)

3)  ¿En qué se diferencia una traducción cultural y una traducción filolóxica? (1 ptu)

4)  ¿Qué traducción ye la más perfecta? (0.25 ptos.) ¿Por qué? (0.75 pts.)

5) Si nuna traducción t’alcuentres con NT, ¿qué significa? (0.25 ptos.) ¿Pa qué s’usa? (0.75 ptos.).

6)  ¿Por qué l’oficiu d’escribir ye ún de los más desagradecíos de la lliteratura? (1 ptu.)

7)  La traducción n’asturianu, ¿cuenta con una tradición afitada o ye novedosa? Razona la rempuesta (1 ptu.)

8)    ¿Por qué ye importante una traducción pa una llingua? Da tres razones del testu y desplícales COLES TOS PALLABRES.

9)    ¿Qué otros significaos pue tener la pallabra tornar? (1 pt)

10)    L’autor, ¿ta a favor de que se traduzan obres al asturianu o a la escontra? ¿Por qué? (0.5 pts) Y tu, ¿qué opines? Razona la to rempuesta (0.5 ptos)

L'ensayu como xéneru lliterariu

Característiques

     L’Academia de la Llingua Asturiana define l’ensayu, na so tercera acepción, como “xéneru lliterariu, en prosa y non narrativu [onde se reflexona llibremente sobre dellos temes]”.

     L’ensayu ye, entós, xunto colos otros tres xéneros lliterarios (narrativa, llírica y teatru) un xéneru lliterariu que s’escribe en prosa y que nun ye narrativu, anque a vegaes pueda adoptar forma narrativa o dialogada.

     ¿Qué ye lo que define al ensayu? Lo que define al ensayu ye’l so conteníu reflexivu y la voluntá d’estilu: nél, l’autor o autora espón llibremente les sos idees, ensin necesidá de sustentales con un aparatu críticu, por eso Ortega y Gasset lu llamaba “la ciencia ensin la prueba esplícita”.

     Esti matiz ye importante, porque en vien de vegaes confúndese lo que son los trabayos d’investigación colos ensayos. Nun ensayu l’autor pue opinar llibremente, de manera incluso asistemática, demientres que nos trabayos d’investigación (tesis doctorales, tesines, trabayos monográficos, etc.) l’aparatu críticu ye esencial ya imprescindible y cada afirmación debe tar sustentada y ser sistemática. Los trabayos d’investigación siguen, necesariamente un métodu de trabayu y d’esposición fuertemente codificáu.

Historia

     L’ensayu, como xéneru, cuayó nel Sieglu XVIII de mano del movimientu de la Ilustración, que pregonaba y emponderaba la razón frente al sentimientu o sentimentalismu. Los ilustraos cultivaben l’ensayu como manera afayadiza de comunicar el pensamientu y el conocimientu, de manera entretenida y con un estilu accesible.

     Nun ye qu’enantes nun esistieren testos que podíemos considerar como ensayos (podríemos atopalos nos autores grecorromanos y nel Renacimientu los Trataos contaron con munchos siguidores tanto nel planu de la creación como nel de la recepción), pero ye nel XVIII onde’l xéneru atopa una posición central y s’espliciten les característiques del xéneru.

Estructura

     L’ensayu tien suel tener una estructura que ye la siguiente:

      -Introducción: plantéase’l tema central del ensayu y l’oxetivu del mesmu.

     -Desendolcu: esposición y analís cola aportación de les idees propies; sostiénse la tesis yá aportada na introducción y afóndase treslladando al llector o llectora les preguntes que siguen ensin tener rempuesta y compartiéndoles con él.

      -Conclusión: trátase de zarrar el tema y danse posibles víes de solución p’aquelles cuestiones que nun se pudieron o supieron resolver.

La traducción

La traducción (tamién llamada torna n’asturianu) ye l’efectu o resultáu de traducir, que d’acordies cola definición del Diccionariu Asturianu de la Llingua Asturiana (DALLA), ye “poner nuna llingua lo que ta dicho n’otra”.  

La persona que traduz ha conocer les dos llingües que pon en rellación con muncha fondura pa mantener con ésitu tolos sentíos que’l primer testu, del que se parte, tien y la intencionalidá del autor/a. Poro, quien traduz ha atenese a los sentíos y característiques d’esi testu de partida, y, en casu de tener errores, por exemplo, nun los pue iguar, sinón mantenelos, ensin intentar aportar nada de sigo al testu nuevu, más que la intención de mantenese fiel al espíritu del testu de partida.

Tipos de traducciones

Partiendo de la mayor o menor fidelidá al testu, y combinándolo cola variable de facelo comprender a un determináu públicu receptor vamos a tener dellos tipos de traducciones:

·         Traducción modelu: Ye la traducción qu’intenta ser más fiel al testu del que parte pa facelu llegar a la otra llingua intentando caltener tol sentíu y el másimu apegu de contení, estilu, sonoridá, etc. Nesti tipu de torna ponse l’acentu nel testu y nel emisor/a del mesmu, ensin importar más otro que la interpretación de la intención del autor/a. Nun tien en cuenta al públicu.

·         Adaptación: Ye una traducción que se fae empobinada pa determináu públicu. Por delles razones, estímase que’l testu nun va ser comprendíu por esi públicu receptor polo que nun se fae una traducción fiel sinón que se camuda pa facer el testu más accesible. Asina, les adaptaciones suelen dase munches vegaes nel ámbitu de la educación. Asina, cuando en determinaes ocasiones se vos manda lleer dalguna obra, como por exemplu El Quijote, lo que se fae ye recurrir a una adapción que suel consistir un resume de lo más significativo de la obra (adaptase por motivos d’estension); o en delles vegaes, lo que se fae ye poner nun llinguax muncho más llanu, ello ye, más accesible, aquello que l’autor/a dixo con un llinguaxe más complicáu.

·         Versión: La versión consiste nuna nueva forma qu’algama un testu cuando de manera deliberada el traductor/a introduz cambeos nél. N’ocasiones, los escritores suelen facer versiones d’obres y composiciones d’otros autores que-yos presten ensin ánimu de ser fieles, sinón más bien faciendo una reconstrucción personal de la obra. La versión ye bastante común, por exemplu, nel mundu de la música, onde grupos o cantantes “versionen” cantares d’otros, ello ye, faen una obra nueva partiendo de l’antigua.

·         Traducción cultural: Consiste en que se treslladen fechos y fenómenos culturales nuna traducción por otros que puedan ser equiparables. Asina, por exemplu, una pinta de cerveza del mundu anglosaxón pue camudar nuna pinta de vinu nel mundu hispánicu; una fiesta como Halloween pue convertise nel nuestru antroxu; el football americanu nel fútbol FIFA, etc.  

¿Traducir na mesma llingua?

Convién tener en cuenta qu'en munches vegaes les traducciones puen facese nuna mesma llingua, ye dicir, adaptando les estremaes variedaes de la llingua les peculiaridaes de determináu públicu receptor: ye lo que se fae cuando se traduz, por exemplu, testos medievales a la llingua actual (variedá diacrónica); cuando s’adapten testos a les peculiaridaes llingüístiques d'un territoriu (variedá diatópica) o cuando s'adapten los testos a la variedá de determináu públicu o situación (variedá diatópica o diacrónica).

Importancia de la traducción

Les traducciones son importantes pa una llingua porque enanchen el saber de la comunidá llingüística a la qu'esos testos son tornaos; hai que pensar que nun solo traducimos obres lliteraries, sinón que tamién podemos traducir manuales de melicina, de socioloxía, les instrucciones de los aparatos elléctricos, etc.

Amás, otru factor importante de la traducción ye que la llingua esperimenta un cambéu positivu porque al reflexar otres circunstancies y cultures enancha'l so campu referencial, arriquez el so vocabulariu, y amplia la so visión del mundu.

Les traducciones aporten, amás, prestixu a la llingua.

La traducción n’asturianu

Una de les principales pegues que se-y poníen a la normalización y la dignificación de la llingua asturiana de la que'l Xurdimientu entamó coles so reivindicaciones, yera que l’asturianu nun yera aptu pa espresar ciertos temes, o que la llingua asturiana namás yera amañosa pa la poesía.

        Nun facía falta más que mirar lo qu’hasta entós s’escribiere n’asturianu pa ver qu’ello yera too mentira. L’asturianu cuenta, dende los sos inicios medievales, con munches adaptaciones, traducciones y recreaciones. Asina, munchos de los documentos medievales asturianos de calter xurídicu yeren traducciones de lleis; tamién, el primer autor asturianu, Antón de Marirreguera, fae una versión de les fábules clásiques de Píramu y Tisbe y Hero y Lleandro.

Munches de les obres y traducciones del sieglu XIX ya inicios del XX enfótense en dar a conocer a la xente les nueves idees, asina apaez el Catecismu del Llabrador, o tradúcense bules papales y entamen a tornase dalgunes partes de la Biblia.

Sicasí, el verdaderu españíu de la traducción en llingua asturiana va tener llugar, como cuásique tola lliteratura n’asturianu, a partir del Xurdimientu. Ye entós cuando, con mirada moderna, s’entama a traducir en condiciones obres dende les diverses llingües europees al asturianu, con múltiples adaptaciones y versiones por xente qu’estudió filoloxía y que traduz con bon criteriu. Ello ye dalgo mui meritable, sobremanera si tenemos en cuenta que nun esisten traductores profesionales, ye dicir xente que tenga por oficiu’l de traducir.

Muestrariu d’obres en llingua asturiana

Como dicíemos enantes, esisten obres lliteraries y filosófiques que foron traducíes al asturianu dende los principales idiomes europeos. Darréu ofrecémoste un breve y escuetu que nun ye pa nada eshaustivu nin completu de dalgunes obres traducíes y espublizaes dende distintos idiomes.

Llingua	Autores	Obres
Gallegu	Xosé Neira Vilas	Memories d’un nenu llabriegu
	Eduardo Blanco Amor	La folixa
	Alvaro Cunqueiro	Escuela de melecineiros; Merlín y familia
Portugués	Miguel Torga	Cuentos de la montaña
	José Viale Mountinho	Cuentos fantásticos
Catalán	Salvador Espriu	El caminante y la muria
Euskera	Bernardo Atxaga	Obabakoak
Francés	Honoré de Balzac	Pelleyu de badana
	Ramon Radiguet	El diablu en cuerpu
	Jules Verne	La vuelta al mundu n’ochenta díes
Alemán	Kafka	La metamorfosis
	Peter Handke	La muyer manzorda
	Karl Marx	El manifiestu comunista
Rusu	Varios autores	Cuentos rusos
Griegu	Homero	La Iliada
		Evanxeliu de San Xuan
		Evanxeliu de San Lluques
Checu	Pavl Dobsinsky	Cuentos eslovacos
Inglés	Robert Louis Stevenson	La islla del tesoru; L’estrañu casu del doctor Jekyll y Mr. Hyde
	Jane Austen	Arguyu y prexuiciu
	Scott Fitzgerald	El gran Gatsby

Dalgunos finxos

                Anguaño, ensin contar con nengún traductor/a profesional (esto ye, xente que viva dedicao n’esclusiva a la traducción) podemos facer un balance positivu porque cuéntase con un corpus importante d’obres traducíes, ente elles, por ser una obra de referencia (dizse que ye’l llibru más lleíu del mundu), el Nuevu Testamentu de la Biblia.

Amás, dende l’añu 2008 cuéntase cola ferramienta de traducción en rede eslema, que surdió d’un proyectu d’investigación de la Universidá d’Uviéu.