La traducción

La traducción (tamién llamada torna n’asturianu) ye l’efectu o resultáu de traducir, que d’acordies cola definición del Diccionariu Asturianu de la Llingua Asturiana (DALLA), ye “poner nuna llingua lo que ta dicho n’otra”.  

La persona que traduz ha conocer les dos llingües que pon en rellación con muncha fondura pa mantener con ésitu tolos sentíos que’l primer testu, del que se parte, tien y la intencionalidá del autor/a. Poro, quien traduz ha atenese a los sentíos y característiques d’esi testu de partida, y, en casu de tener errores, por exemplo, nun los pue iguar, sinón mantenelos, ensin intentar aportar nada de sigo al testu nuevu, más que la intención de mantenese fiel al espíritu del testu de partida.

Tipos de traducciones

Partiendo de la mayor o menor fidelidá al testu, y combinándolo cola variable de facelo comprender a un determináu públicu receptor vamos a tener dellos tipos de traducciones:

·         Traducción modelu: Ye la traducción qu’intenta ser más fiel al testu del que parte pa facelu llegar a la otra llingua intentando caltener tol sentíu y el másimu apegu de contení, estilu, sonoridá, etc. Nesti tipu de torna ponse l’acentu nel testu y nel emisor/a del mesmu, ensin importar más otro que la interpretación de la intención del autor/a. Nun tien en cuenta al públicu.

·         Adaptación: Ye una traducción que se fae empobinada pa determináu públicu. Por delles razones, estímase que’l testu nun va ser comprendíu por esi públicu receptor polo que nun se fae una traducción fiel sinón que se camuda pa facer el testu más accesible. Asina, les adaptaciones suelen dase munches vegaes nel ámbitu de la educación. Asina, cuando en determinaes ocasiones se vos manda lleer dalguna obra, como por exemplu El Quijote, lo que se fae ye recurrir a una adapción que suel consistir un resume de lo más significativo de la obra (adaptase por motivos d’estension); o en delles vegaes, lo que se fae ye poner nun llinguax muncho más llanu, ello ye, más accesible, aquello que l’autor/a dixo con un llinguaxe más complicáu.

·         Versión: La versión consiste nuna nueva forma qu’algama un testu cuando de manera deliberada el traductor/a introduz cambeos nél. N’ocasiones, los escritores suelen facer versiones d’obres y composiciones d’otros autores que-yos presten ensin ánimu de ser fieles, sinón más bien faciendo una reconstrucción personal de la obra. La versión ye bastante común, por exemplu, nel mundu de la música, onde grupos o cantantes “versionen” cantares d’otros, ello ye, faen una obra nueva partiendo de l’antigua.

·         Traducción cultural: Consiste en que se treslladen fechos y fenómenos culturales nuna traducción por otros que puedan ser equiparables. Asina, por exemplu, una pinta de cerveza del mundu anglosaxón pue camudar nuna pinta de vinu nel mundu hispánicu; una fiesta como Halloween pue convertise nel nuestru antroxu; el football americanu nel fútbol FIFA, etc.  

¿Traducir na mesma llingua?

Convién tener en cuenta qu'en munches vegaes les traducciones puen facese nuna mesma llingua, ye dicir, adaptando les estremaes variedaes de la llingua les peculiaridaes de determináu públicu receptor: ye lo que se fae cuando se traduz, por exemplu, testos medievales a la llingua actual (variedá diacrónica); cuando s’adapten testos a les peculiaridaes llingüístiques d'un territoriu (variedá diatópica) o cuando s'adapten los testos a la variedá de determináu públicu o situación (variedá diatópica o diacrónica).

Importancia de la traducción

Les traducciones son importantes pa una llingua porque enanchen el saber de la comunidá llingüística a la qu'esos testos son tornaos; hai que pensar que nun solo traducimos obres lliteraries, sinón que tamién podemos traducir manuales de melicina, de socioloxía, les instrucciones de los aparatos elléctricos, etc.

Amás, otru factor importante de la traducción ye que la llingua esperimenta un cambéu positivu porque al reflexar otres circunstancies y cultures enancha'l so campu referencial, arriquez el so vocabulariu, y amplia la so visión del mundu.

Les traducciones aporten, amás, prestixu a la llingua.

La traducción n’asturianu

Una de les principales pegues que se-y poníen a la normalización y la dignificación de la llingua asturiana de la que'l Xurdimientu entamó coles so reivindicaciones, yera que l’asturianu nun yera aptu pa espresar ciertos temes, o que la llingua asturiana namás yera amañosa pa la poesía.

        Nun facía falta más que mirar lo qu’hasta entós s’escribiere n’asturianu pa ver qu’ello yera too mentira. L’asturianu cuenta, dende los sos inicios medievales, con munches adaptaciones, traducciones y recreaciones. Asina, munchos de los documentos medievales asturianos de calter xurídicu yeren traducciones de lleis; tamién, el primer autor asturianu, Antón de Marirreguera, fae una versión de les fábules clásiques de Píramu y Tisbe y Hero y Lleandro.

Munches de les obres y traducciones del sieglu XIX ya inicios del XX enfótense en dar a conocer a la xente les nueves idees, asina apaez el Catecismu del Llabrador, o tradúcense bules papales y entamen a tornase dalgunes partes de la Biblia.

Sicasí, el verdaderu españíu de la traducción en llingua asturiana va tener llugar, como cuásique tola lliteratura n’asturianu, a partir del Xurdimientu. Ye entós cuando, con mirada moderna, s’entama a traducir en condiciones obres dende les diverses llingües europees al asturianu, con múltiples adaptaciones y versiones por xente qu’estudió filoloxía y que traduz con bon criteriu. Ello ye dalgo mui meritable, sobremanera si tenemos en cuenta que nun esisten traductores profesionales, ye dicir xente que tenga por oficiu’l de traducir.

Muestrariu d’obres en llingua asturiana

Como dicíemos enantes, esisten obres lliteraries y filosófiques que foron traducíes al asturianu dende los principales idiomes europeos. Darréu ofrecémoste un breve y escuetu que nun ye pa nada eshaustivu nin completu de dalgunes obres traducíes y espublizaes dende distintos idiomes.

Llingua	Autores	Obres
Gallegu	Xosé Neira Vilas	Memories d’un nenu llabriegu
	Eduardo Blanco Amor	La folixa
	Alvaro Cunqueiro	Escuela de melecineiros; Merlín y familia
Portugués	Miguel Torga	Cuentos de la montaña
	José Viale Mountinho	Cuentos fantásticos
Catalán	Salvador Espriu	El caminante y la muria
Euskera	Bernardo Atxaga	Obabakoak
Francés	Honoré de Balzac	Pelleyu de badana
	Ramon Radiguet	El diablu en cuerpu
	Jules Verne	La vuelta al mundu n’ochenta díes
Alemán	Kafka	La metamorfosis
	Peter Handke	La muyer manzorda
	Karl Marx	El manifiestu comunista
Rusu	Varios autores	Cuentos rusos
Griegu	Homero	La Iliada
		Evanxeliu de San Xuan
		Evanxeliu de San Lluques
Checu	Pavl Dobsinsky	Cuentos eslovacos
Inglés	Robert Louis Stevenson	La islla del tesoru; L’estrañu casu del doctor Jekyll y Mr. Hyde
	Jane Austen	Arguyu y prexuiciu
	Scott Fitzgerald	El gran Gatsby

Dalgunos finxos

                Anguaño, ensin contar con nengún traductor/a profesional (esto ye, xente que viva dedicao n’esclusiva a la traducción) podemos facer un balance positivu porque cuéntase con un corpus importante d’obres traducíes, ente elles, por ser una obra de referencia (dizse que ye’l llibru más lleíu del mundu), el Nuevu Testamentu de la Biblia.

Amás, dende l’añu 2008 cuéntase cola ferramienta de traducción en rede eslema, que surdió d’un proyectu d’investigación de la Universidá d’Uviéu.

The Real Xixon Sound

Güei traemos pa trabayar en clas un cantar potente del grupu Soncai System.

Lletra:

The Real Xixon Sound

Soncai System

(Entradina)

Roma cayó, Nueva York fue atacada,
sueña Babilonia una historia inventada;
arde París baxo’l truenu les bombes,
caces alemanes sobrevuelen Londres;
Saraxevo ye’l reinu del francotirador,
en Derry les madres lloren el dolor.
Pero a esta ciudá de nueches histériques
nun-y queda sitiu p’aventures épiques.

Na decadencia guaña l’oficiu
carne vendío a la mafia del lladriyu;
tardes de coca a la vera l’eloxu
nueches nel Casino onde se cuez el negociu.
Ruses y rumanes toes illegales
ánxeles cubanes qu’a cubanes se lo ganen,
barrios de luxu pa los exmineros
refalfien na cai tolos posmodernos.

Roma nun cayó, sueña Nueva York,
nun sabe Babilonia qué rasta la inventó;
París nunca ardió, nunca sintió les bombes,
turistes alemanes enfílense en Londres.
En Saraxevo hai antenes pel teyáu
les madres de Derry d’escursión pel condáu.
Pero esta ciudá de nueches imprevistes
guarda la memoria d’unes cuantes vides tristes.


Estrib.

(Salida)

Propuesta pa enllenar raleres:


Roma cayó, Nueva York fue atacada,
sueña Babilonia una historia inventada;
arde París baxo’l ___________ les bombes,
_________ alemanes sobrevuelen Londres;
Saraxevo ye’l reinu del francotirador,
en Derry les madres lloren el dolor.
Pero a esta ciudá de nueches ____________
nun-y queda sitiu p’aventures ____________

Na decadencia _____________ l’oficiu
carne vendío a la mafia del _____________;
tardes de coca a la vera l’Eloxu
nueches nel Casino onde se __________ el negociu.
Ruses y rumanes toes illegales
ánxeles cubanes qu’a cubanes se lo ganen,
barrios de __________ pa los exmineros
________________ na cai tolos posmodernos.

Roma nun cayó, sueña Nueva York,
nun sabe Babilonia qué rasta la inventó;
París nunca ardió, nunca sintió les bombes,
turistes alemanes __________ en Londres.
En Saraxevo hai antenes pel teyáu
les madres de Derry d’escursión pel condáu.
Pero esta ciudá de nueches imprevistes
guarda la memoria d’unes cuantes vides tristes.

Estrib.

(Salida)

XERES PA TRABAYAR 

Música

1) ¿Conoces al grupu Soncai System? Busca información sobre él.

2) ¿Cómo definiríes esti estilu de música n’asturianu?

3) ¿Conoces otros grupos o cantantes n’asturianu que fagan música que s’alloñe del folk y de lo tradicional?

4) ¿Sabes a cuentu de qué vien el títulu de The Real Xixon Sound? ¿Sabes lo que ye’l Xixon Sound?

Conteníu de la lletra

5) Esta lletra refierse a una ciudá, ¿qué ciudá pue ser? ¿Qué elementos (llugares, persones, etc.) d’esta ciudá pues reconocer na canción? ¿Cómo ye la visión que s’ufierta de la ciudá?

6) La ciudá compárase con otres ciudaes y notros momentos históricos con conflictos; ellabora una riestra coles ciudaes y colos conflictos bélicos que nelles asocedieron.

7) Por embargu, como se pue ver, dempués, n’otra estrofa de la canción desmiéntense esos conflictos, ufiértase una nueva visión de les ciudaes: ¿qué visión ye esa? ¿Qué crees que s’intenta tresmitir con esti paralelismu?

8) ¿Qué temes d’actualidá ves na lletra?

9) ¿Cuántes llingües yes quien a sentir nesta canción?

10) El cantar entama con un comentariu deportivu y acaba con otru comentariu. ¿Qué comentariu ye’l que s’inxerta al final? ¿Qué crees que s’intenta tresmitir con esos comentarios?

Llingua
11) Pallabreru. ¿Sabes qué signifiquen estes pallabres? Búscales en dicionariu en llinia de la ALLA:
a. Guañar:
b. Soñar/suañar:
c. Enfilar:
d. Épica:
e. Refalfiar:
12) ¿Qué fenómenu llingüísticu se da na siguiente espresión: carne vendío?
13) Atropa toles preposiciones que seyas quien nel poema.
14) Atropa tolos alverbios que seyas quien a atropar y clasifícalos.
15) ¿Ta bien usada la preposición per nesti cantar?
16) Sustitúi les partes sorrayaes por pronomes átonos.

La edición en llingua asturiana

La edición desempeña un papel mui importante en cualquier lliteratura, pues ye’l mediu pel que los autores dan a conocer les sos obres lliteraries al públicu.

Circuitu editorial

    Llámase circuitu editorial a les estremaes manes peles qu’atraviesa una obra lliteraria dende que sal de les manes de la persona que la crea hasta que llega al públicu o destinatariu/a. Tradicionalmente, el circuitu editorial consolidáu tien una serie d’axentes que s’encarguen de diferentes pasos pa facer que la obra lliteraria llegue al públicu. Estos axentes funcionen como intermediarios ente l’emisor/a de la obra lliteraria y el receptor/a de la mesma.

    Hai que tener en cuenta que la llingua asturiana ye una llingua minoritaria y que munchos de la mayoría de los sos falantes son analfabetos nesa llingua, ye dicir, nun saben lleer nin escribir nella.

    Amás, como de xuru que t’alcordarás d’años pasaos, la lliteratura asturiana nun pasó a la imprenta hasta bien tarde, siendo hasta entós el so mediu de transmisión manuscritu, lo que fae que munches obres tean estraviaes o perdíes a cuenta de los pocos exemplares que se ficieron d’elles.

    Ún de los factores importantes pa la tresmisión d’una lliteratura y pa dala a conocer y qu’esista un bon circuitu editorial que ponga en relación autores y públicu y facilite la tresmisión de les obres lliteraries. Ye ehí onde xueguen un papel importante estos caxellos, caún cola so función.

Los inicios d’un circuitu editorial consolidáu

     Como en tantes otres coses, el Xurdimientu vieno a cambiar el panorama del circuitu editorial de la lliteratura en llingua asturiana. Hasta entós, nun había nenguna editorial qu'espublizase únicamente en llingua asturiana, esto ye, nenguna editorial especializada mayormente nello. Hasta entós, les publicaciones en llingua asturiana garraben dos caminos p'asoleyase:

     · recurríase a l'autoedición, asumiendo l'autor/a los costos de la edición y encargándose personalmente de facer llegar el llibru a les llibreríes (y n'ocasiones hasta vendiéndolu él/ella mesmu): ye lo que fizo, por exemplu, Xosé Álvarez, “Pin”, cola so obra Fíos de naide.

        · los llibros yeren asoleyaos por entidaes o instituciones qu'espublizaben les obres de los clásicos o de los propios miembros d'eses instituciones (como ye'l casu del IDEA) o otres alministraciones ya entidaes que s'enfotaben asina nel procesu de recuperación de la llingua asturiana al tresviés de da-y puxu a la lliteratura que se facía entós: ye'l casu del Institutu de Bachilleratu “Jerónimo González”, de Sama de Llangréu, que convocaba un premiu editando un llibrín nel qu’espublizaron munchos de los/es autores de referencia de la primer Xeneración del Xurdimientu (Nel Amaro, Xuan Xosé Sánchez Vicente, Vicente García Oliva); el Seminariu de Llingua Asturiana de la Universidá d'Uviéu, qu'espublizó estudios y tuvo una colección de cartafueyos onde s'asoleyó la primer novela en llingua asturiana, Les llamuergues doraes, de Miguel Solís Santos; la daquella recientemente creada Academia de la Llingua que va espublizar delles coleiciones, o la Diputación Provincial, primero y la Xunta Xeneral, dempués, que crear y mantener la los premios lliterarios que con calter añal se cellebren y que fueron contemplando nueves modalides hasta anguaño. De mano, namás contemplaron el premiu de novela Xosefa de Xovelanos a los que dempués se diríen sumando'l premiu de poesía Acebal; el premiu d'ensayu Máximo Fuertes Acevedo; el premiu de periodismu Enriqueta González Rubín; el premiu de cómic Alfonso Iglesias...

Los años noventa: les primeres editoriales

     Nos años noventa esti panorama editorial va camudar ayudáu por dos fenómenos: cada vegada esiste un públicu mayor que demanda productos lliterarios fechos en llingua asturiana (anque siga siendo minoritariu) y el gobiernu del Principáu d'Asturies va contemplar una llinea de subvenciones pa l'ayuda a la edición de llibros en llingua asturiana. Asina, comiencen a espublizase llibros por editoriales, dalgunes de les más importantes son les que vienen darréu:

· Azucel (Avilés), onde s'espublizó una colección de cuentes y noveles de tema policiacu y esperimental.

· Llibros del pexe (Xixón) con delles llinees editoriales que contemplaben lliteratura de cración asturiana (poesía, narrativa); torna, traducción d'autores y obres estranxeres al asturianu (Herbert H. Wells, Barrie, Stevenson, Cunqueiro); ediciones empobinaes al públicu infantil y xuvenil; ediciones que recuperaben testos clásicos de la lliteratura asturiana (La xudit, por exemplu) o la obra monumental en cómic sobra la historia de l'Asturies medieval, La crónica de Leodegundo.

· Trabe (Uviéu), que ye ensin dulda una de les principales editoriales asturianes con un fondu onde espublizaron los principales autores del momentu. Publica poesía (coleiciones Álbera o La fonte de Frascura), narrativa (Incla interior) y traducciones al empar que recupera autores y testos de la historia de la lliteratura, como ye'l casu de Marcos del Torniello, el padre Galo, Pachín de Melás, etc. Tien tamién colecciones empobinaes a los más pequeños, como ye'l casu de Montesín.

· Editora del Norte (Mieres) Con llinies d'edición de poesía y narrativa, tamién contemplaba la traducción d'autores estranxeros al asturianu, como ye'l casu d'Obabakoak, d'Atxaga; de les obres de John Berger o d'autores gallegos como Caride Ogando o Suso de Toro.

· Vtp (Xixón) ye una editorial que publica obres en prosa, versu, traducciones d'autores foriatos, al empar que publica tamién estudios de diversa triba sobre aspeutos culturales asturianos, como puen ser los estudios de Berto Álvarez Peña sobre la mitoloxía. Tien obres que tán empobinaes tamién al públicu infantil y xuvenil y ye la editorial de los principales llibros de testu de l'asignatura de llingua asturiana (REDE, Pitín...)

· Ámbitu, que xunto cola edición en llingua asturiana de traducciones, ensayos, llibros de poesía y de narrativa, pasará a la historia por ser la editorial que más tiempu tuvo na cai un periódicu de calter selmanal, Les Noticies.

    Xunto con esti esporpolle d'editoriales, xurdieron les primeres llibreríes especializaes, ye dicir, les primeres llibreríes especializaes na espublización de los llibros en llingua asturiana, que facíen por tener tol fondu. Les de más sonadía foron la llibrería Paraxuga (Uviéu) y la llibrería Alborá (Xixón). Sicasí, el mercáu asturianu foi abriéndose, pasín ente pasu, un sitiu nes baldes de les llibreríes xeneralistes.

  

     La edición en llingua asturiana al empiezu del segundu mileniu

     Nos primeros años de la década del dos mil, al abellugu de la bonanza económica, les editoriales asturianes tuvieron un periodu d'espansión, ampliando'l númberu de títulos espublizaos per añu, metiendo a más personal a trabayar, abriendo nueves posibilidaes de mercáu...

     Ello fizo qu'incluso apaecieren más editoriales asturianes, como ye'l casu de Suburbia (Xixón) o Universos (Mieres).

    Sicasí, cola llegada de la crisis económica, les más d'estes editoriales nun fueron pa soportar el tiempu duru que-yos tocó vivir y munches d'elles tuvieron qu'echar el piesllu o contemplar nuevos nichos de mercáu, faciendo trabayos de xestión editorial (esto ye, facer trabayos por encargu envede dedicase a espublizar lo que más-yos prestaba).

     

Amás, la popularización de nuevos sistemes de comunicación y nuevos productos, como ye'l casu de la edición dixital, abre nueves espeutatives.

Un raposu en Tresmonte

1.-Fai la ficha técnica del llibru.Una ficha técnica tien que tener, polo menos:

APELLÍOS y Nome del Autor:
Títulu (en cursiva):
Llugar onde s’espublizó:
Editorial:
Añu de publicación:


2.-Averigua datos sobre l’autor y sobre otres obres que tenga.


3.-Fai un resume del llibru.


4.-Describe a los personaxes principales.


5.-Estructura interna/esterna. ¿Ta dividíu en capítulos? ¿Tienen nome y/o númberu? Atopa les partes
en que ta dividíu y agrúpales d’acordies colo que pasa nelles (principiu, nuedu, desenllaz)


6.-Ambiente. ¿Ónde s’asitia’l trescurrir de l’acción? ¿En qué época? ¿Cómo yes quien a sabelo?


7.- ¿Paezte que ye una historia que pue pasar na realidá? ¿Por?


8.-El personaxe principal escapa al monte. ¿Por qué? ¿Qué otros casos asemeyaos a esti escándalu conoces? Busca dalgún tema d’actualidá que pueda encaxar.


9.-¿Cómo evoluciona’l paisanu? ¿Da-y importancia a les mesmes coses enantes d’echase al monte que cuando vive nél?


10.-Recomienda esti llibru a un collaciu/a.

Tatuaxes nel corazón

1) Fae un resume del llibru.
2) Describe a los personaxes principales.
3) ¿Por qué te paez que’l llibru se titula Tatuaxes nel corazón?
4) Busca información per interne n’asturianu sobre Ruma Barbero y Marisa López Diz. ¿Qué obres últimes sacaron?
5) ¿Paezte que nel llibru tienen abonda importancia los dibuxos? ¿Por qué? Xustifica la to rempuesta.
6) ¿Qué gustos tienes en común cola protagonista?
7) ¿Qué coses faen a la protagonista sentise atristayada? ¿Qué conseyos-y daríes?
8) La protagonista quier facese un tatuaxe, pero ello nun ye cosa de pocu valir. ¿Qué significación tienen los tatuaxes en delles cultures? Busca información per interné d’ello.
9) Si te dexaren facete un tatuaxe y quixeres, ¿qué dibuxu escoyeríes pa que te representare? Fae un bocetu y desplica la so importancia pa ti.
10) Recomienda esti llibru a un/a amigu/a diciendo qué coses son les que más te prestaron y qué coses les que menos.

Muertes, de José Luis Rendueles

MUERTES

Tas en casa, paisax de la to infancia, alcordándote de los collacios de la escuela, los xuegos nel recréu: l’esconderite, el tu te quedes, les chapes y munchos más de los que nun t’alcuerdes. Entós les mayores preocupaciones yeren que les clases acabaren ceo, que t’escoyieren pa xugar el partíu, o tar siempres mirando perriba’l llombu que nun se t’acercare naide pa palmotiate y dicite “tu te quedes” y entós tener que pasá-ylo a otru… Pero medrasteis y al acabar la escuela la vida separóvos y caún tiró pa onde pudo, ensin perder el contautu dafechu.

Y cada añu diben llegándote noticies de los que diben faltando: Nel morriera’l primeru, de sobredosis; Chus nun accidente de tráficu volviendo d’un permisu la mili; Xandru aplastáu por un costeru la mina; María suicidárase ensin que nadie supiere por qué; y asina añu tres añu, hasta que solo quedárais Sandra y tu. Talmente paecía qu’una maldición cayera enriba vuestro por pasalo tan bien de nenos. Nun yera normal, pensabes, si nengún cumpliere los trenta.

Y güei acabes dir al entierru de Sandra, la to primer moza, la última superviviente la pandilla, muerta d’un paru cardiacu. Ensin dulda, la muerte que más te mancó.

Tuvisti murniu tol día y nun falasti con naide na iglesia. Agora ye cásique medianueche y nun yes a dormir, asina que tas tomando una copina a ver si te vien el sueñu porque quies colar bien ceo pa la capital, pa tol mundu tan distintu yá d’esti qu’una vez foi’l tuyu, dexar atrás tolos recuerdos y somorguiase na vida de tolos díes. Y tas pensando nello y nel viaxe que t’espera mañana cuando piquen a la puerta.

Abres y ellí ta Sandra, a la qu’enterrasteis esa mesma tarde. Ta perpálida na so ropa escuro y paezte que ya que fiede un poco, pero sorriete como anantia y allarga la mano pa tocate nel hombru. Malpenes te da una palmadina.

-Tu te quedes-diz.

Quédeste ablucáu y ella da la vuelta. Y mientes la ves allonxase, tornando pa la so sepultura, albidres que ye inútil preocupate pol viaxe de mañana.

José Luis Rendueles, Cuentos chinos, Uviéu, Trabe, 2001 páxs. 10 y 11

 1.    Fai un resume del testu. (1 puntu)

 2.   ¿Por qué nun paga la pena preocupase pol viaxe de mañana? (1 puntu)

 3.    Entrugues (2 puntos):

a) El narrador fala del paisax de la infancia: ¿qué elementos hai nel cuentu que puedan referise a la infancia? Atopa polo menos cinco. (0,5)

b) ¿Cuántos personaxes hai na historia? (0,5)

c) ¿Qué ye lo que los xunía de neños? (0,5)

d) ¿Qué ye lo que los xune agora de mayores? (0,5)

4. Estructura. ¿En cuantes partes pues dividir el testu? Xustifica la to decisión faciendo ver qué criterios utilices. (1 puntu)

     5. Títulu y conteníu.

¿Por qué te paez que’l se titula Muertes el testu?(0,5)

¿Qué rellación hai col conteníu del cuentu? (0,5)

6. Final.

a) ¿Qué ye lo que, siguiendo la lóxica del relatu, va pasa-y al protagonista? (1 puntu)

b) Inventa tu’l final d’esta historia. (2 puntos)

Un cuentín de mieu, de José Luis Rendueles

Un cuentín de mieu

de José Luis Rendueles

Fai cincuenta años nun pueblín de Grao, la víspera de Tolosantos, había dellos paisanos chumando nel chigre. Yera una nueche especialmente escura, con una nublina trupo arrastrada por rabaseres d’un airón frío que trescalaba la ropa. Siendo’l día que yera, y tando como taba fuera, los veceros entamaron a contar hestories de güercos y pantasmes. Ente ellos, el más miedica paecía Nolín, y cuando dalguién-y lo echó en cara retrucó mui farrucu qu’él nun tenía mieu nengún. Una cosa llevó a la otra y nel intre había una apuesta enriba la mesa: a que nun s’atrevía a dir esa mesma nueche al cementeriu y clavar un cartelu na tumba d’un vecín qu’acababa morrer.

Pidieron cartón y un plumín al chigreru, y con lletra bien curioso escribieron: “Equí tuvo Nolín, nuna nueche de perros”. Y p’allá foi’l probe infeliz, acoyonáu pero col calorín que da l’oruxu abellugáu nel pechu, col cartelu baxo’l brazu, un martiellu y media docena clavos.

Nunca volvió. Los veceros del chigre camentaron que colara pa casa tres pensalo meyor, pero apaeció muertu nel cementeriu al otru día. Clavar, clavara’l cartelu, pero como tenía les mangues de la chaqueta mui anches, clavárase a sigo mesmu ensin dase cuenta y morriera del sustu, la cara desencaxada, cuando intentó separtase y sintió que lu garraben pela manga.

XERES PA FACER EN LLEENDO’L TESTU

Llee con atención y nun tengas mieu preguntar aquelles coses que nun entiendas

1)      Identifica’l tipu de testu (0,5) y di qué elementos característicos d’esi tipu de testos yes quien a estremar, poniendo ejemplos, del testu (1 ptu)

2)     ¿Qué importancia tien pa la historia qu’esta asoceda la víspera de Tolosantos? (1 ptu)

3)     ¿Cómo inflúi la situación atmosférica na la historia? (1 ptu.)

4)     ¿Por qué aceptó l’apuesta Nolín? (1 ptu)

5)     ¿Quién-y tiraba de la manga a Nolín? (1 ptu)

6)     ¿Ganó Nolín l’apuesta? (1 ptu)

7)     ¿Quién yera’l muertu? (1 ptu)

8)    ¿Paezte que ye en verdá un cuentu de mieu? Xustifica la to rempuesta. (1 puntu)

9)     Redacta una noticia sobre esti sucesu que caltenga la estructura de les noticies (0,5), faciendo por mantener un estilu oxetivu (0,5) y con un pallabreru apropiáu y con procuru ortográficu (0,5)