Banderes blanques de José Luis Rendueles

BANDERES BLANQUES

de José Luis Rendueles Antón

Les vaques bebíen vinu blanco

y dempués tapábenles con mantes.

Nunca les mimaben más

que tres un partu engorriosu.

Siendo yo nenu, cuando una vaca

taba pa parir, inda se xuntaben na mio casa

tolos vecinos pa tirar de la cuerda

que diba arrastrar al xatu de la seguridá

a la vida, virigayu cruel.

Un partu yera la xida necesaria pa xuntase,

contar hestories d’otros tiempos, y cellebralo,

si salía bien, toos xuntos con oruxu y café.

  

Pero delles vegaes la vaca nun puxaba, o’l xatu

yera demasiao grande, o seique venía torcíu

y nun yeren quien a da-y vuelta nel úteru,

entós, acabaos los sos conocimientos,

los remedios d’antanu y los inventaos,

rendíense, y yera cuando m’encargaben

llantar al pie la carretera’l trapu blancu.

Como bandera blanca nun yera gran cosa:

un cachu sábanu amarráu a una guillada,

pero yera’l símbolu de la so derrota.

Nuevos yeren

los métodos que traía’l veterinariu

nel maleteru, aborrecible yera

la so sorrisa de trunfu.

1.     Inda: alv. Entá, tovía. 2 Cuasi, por poco.

2.     Virigayu: Miembru [sexual de los animales machos]. 2 Verga [del güe seca y retorcida que s’emplega como zurdiellu]. 3 Pelleyu [que ta alredor de la verga’l gochu]. 4 Embeligru [d’un animal acabante nacer]. 5 Persona [llarga y delgada].

3.     Xida: sust. Sida, esplicación [que se da pa disculpar o disculpase].

4.     Seique: alv. occ. Quiciabes, a lo meyor, de manera que nun se pue asegurar.

5.     Guiyada: sust. Palu [pa guiar al ganáu]. 2 Palu [con un estremu aguzáu o con una punta de fierro, que s’usa pa facer andar al ganáu nuna direición, pa facer furacos na tierra]. |

 Conteníu

1.- Fai un resume del poema y atopa’l tema central del mesmu.

2.-¿Qué dos mundos s’enfrenten nesti poema? Atropa espresiones o frases nes que quede claru l’enfrentamientu d’estos dos mundos.

3.- ¿Pa qué se ponía una bandera blanca al pie de la carretera?

4.- ¿Qué suel simbolizar una bandera blanca? ¿Tien equí’l mesmu significáu?

Espresión

5.- ¿A qué xéneru lliterariu pertenez el testu? ¿Por qué?

6.- ¿Úsase equi’l llinguaxe lliterariu? Xustifica la to rempuesta.

7.- ¿Quién narra’l poema? ¿Ta dende la perspectiva de primer persona o tercer persona? Axunta espresiones que lo demuestren.

8.-¿En cuántes partes dividiríes el poema? ¿Por qué?

Creatividá

9.-Maxínate otra situación onde se pueda dar esa contraposición ente lo rural y lo moderno.

10.-Fai un pequeñu testu (de cinco a diez llinies) onde afondes de manera lliterario, y n’asturianu, nesa idea.